Avgerðin hjá Kappingareftirlitinum feldi stjóran

Avgerðin hjá Kappingareftirlitinum hevur longu fingið avleiðingar, tí hon var eftir øllum at døma við til at fella stjóran, Jan Ziskasen.

Hann varð í seinastu viku sagdur úr starvi, og nevndarformaðurin, Bjarni Arnason, knýtti tær 45 milliónir krónurnar í sektaruppskotum beinleiðis upp í uppsøgnina av Jan Ziskasen.

Bjarni Arnason segði soleiðis við útvarpið á middegi fríggjadagin:

Klokkan 9.33 fríggjamorgunin sendi nevndin í Føroya Tele miðlunum tíðindaskriv, har boðað var frá, at Jan Ziskasen var farin frá sum stjóri í Føroya Tele-samtakinum, og at William Joensen, fíggjarstjóri, fyribils tók við stjórastarvinum.

Á fundi eina løtu frammanundan vórðu starvsfólkini á Føroya Tele kunnað um uppsøgnina.

Politiskt trýst

Á tí fundinum segði nevndarformaðurin, at um "nevndin ikki handlaði, handlaði onkur annar fyri tey."

Fólk, sum vit hava tosað við, siga, at á fundinum nevndi Bjarni Arnason beinleiðis, at talan var um politiskt trýst.

Í skrivi frá nevndini í gjár, verður tó sagt, at hetta er ein reingjandi útlegging av tí, sum formaðurin segði á fundinum fríggjadagin.

Nevndin skrivar í gjár, at tað stutta av tí langa er, at nevndin tók eina suverena avgerð um at siga stjóran úr starvi.