Kappingareftirlitið: Føroya Tele eigur at hava tvey tilboð

Kappingareftirlitið heldur tað vera neyðugt at geva Føroya Tele boð um at hava tvey tilboð, sum skulu galda í tvey ár.

Kappingareftirlitið mælir til, at Kappingarráðið gevur Føroya Tele boð um at kunngera tilboðini á heimasíðu sínari.

Annað skal vera standardtilboð um eina Full-MVNO avtalu, og hitt skal vera standardtilboð um eina Brand Reseller avtalu.

Kappingareftirlitið skal góðkenna tilboðini.

Misnýttu støðuna

Niðurstøðan hjá Kappingareftirlitinum er, at FT Samskifti hevði eina ráðandi støðu á marknaðinum fyri heilsølu av MVNO-tænastum.

Hesa støðu misnýtti FT Samskifti, tí tað ásetti ein prís fyri Full MVNO-avtalu, sum gjørdi, at ein líka effektivur kappingarneyti ikki kundi kappast á marknaðinum fyri fartelefoni til privat.

Boðini gera ikki, at FT Samskifti missir rættin at kappast um prís. Og tey tryggja at ein líka effektivur kappingarneyti kann reka sína smásølu við tí heilsøluprísi, sum FT Samskifti bjóðar, sigur Kappingareftirlitið.

Føroya Tele misbrúkti sína ráðandi marknaðarstøðu og breyt kappingarlógina. 

Tað er niðurstøðan i drúgvari kanning hjá Kappingareftirlitinum, sum hevur latið málið víðari til løgregluna.

Hetta er annað brotið hjá Føroya Tele á kappingarlógina, sigur Kappingareftirlitið.

Kappingareftirlitið

45 mió. kr.

Tað hevur givið Føroya Tele eitt sektaruppskot, sum er 45 mió.kr.

Avgerðin hjá Kappingareftirlitinum kann kærast til Føroya kærustovn.

Kærustovnurin gav Kappingareftirlitinum viðhald í fyrra málinum.