- Tíðindi, mentan og ítróttur
Brimheim við nýggjum sangi og hugtakandi sjónbandalagi
Brimheim við nýggjum sangi og hugtakandi sjónbandalagi
"Literally Everything" kallast nýggi sangurin hjá Brimheim, sum Heiðrikur á Heygum hevur gjørt eitt sjónbandalag til, ið m.a. er upptikið millum seyð í einum fjósi í Føroyum
Á nýggja sanginum tykist Brimheim hava lagt gotiska rokkin á hillina til frama fyri eitt meira modernað elektroniskt og dansivinarligt úttrykk
Mynd: Heiðrikur á Heygum
28.09.2023 - 18:04
Føroyska Helena Heinesen Rebensdorff, ið framførir tónleik undir navninum Brimheim, hevur av álvara vind í seglunum beint nú.
Og hon ætlar sær at gagnnýta undanvindin, sær tað út til, tí hon hevur júst givið eitt nýtt staklag út.
"Literally Everything" kallast staklagið, ið Helena Heinesen Rebensdorff, Søren Buhl Lassen og Buster Jensen hava skrivað saman. Helena eigur sjálv orðini.
Tónlistarliga er talan um eitt stílbrot í mun til debutplátuna "Can't hate myself into a different shape".
Á nýggja sanginum tykist Brimheim hava lagt gotiska rokkin á hillina til frama fyri eitt meira modernað elektroniskt og dansivinarligt úttrykk.
Aftur við útgávuni av staklagnum fylgir eisini eitt hugtakandi sjónbandalag, ið Heiðrikur á Heygum hevur leikstjórnað.
Sjónbandalagið er upptikið ymsastaðni kring í Føroyum, sigur Heiðrikur á Heygum.
Brimheim sæst dansa millum seyð, neyt og annað gott, sum finst í einum føroyskum fjósi.
Hon er á dekkinum umborð á einum føroyskum fiskiskipi.
Og hon er at finna millum dekk, felgur og ein Mercury-páhangara í einari garasju.
"Eg vildi hava glam/trash-Føroyar fram, og at Brimheim skuldi síggja yvirdrivið gott út í fullkomnari andstøðu til umhvørvið, hon var í," greiðir Heiðrikur á Heygum frá.
"Tað snýr seg um mótsetningar. Eg elski at vísa síður av Føroyum, sum ongin annar tímir at vísa."
Er kopiera
Nýggjastu sendingar í ÚV
Nýggjastu sendingar í SV
