- Bæði útlendsk og føroysk nummur ringja

Triðja føroyameistaraheitið á rað er júst komið undir land, men longu nú fyrireikar KÍ næsta kappingarár.

Áhugin fyri at spæla fyri felagið er stórur, sigur KÍ-formaðurin.

 - Bæði útlendsk og føroysk nummur ringja, váttar Tummas Lervig.

 - Vit eru altíð tíðliga úti, og áhugin fyri okkara felag og okkara liðum er stórur. Eg skal ikki siga, at vit vraka og velja, men vit fáa nógvar fyrispurningar frá áhugaðum spælarum.


Magne Hoseth heldur fram

Leiðslan í KÍ hevði eina stóra uppgávu at loysa, tá Mikkjal Thomassen takkaði fyri seg eftir átta ár sum venjari hjá besta mansliðnum í Klaksvík.

Valið fall á Magne Hoseth, sum ikki hevði stórvegis venjararoyndir at vísa á, men Tummas Lervig er glaður fyri avgerðina, sum varð tikin tá og váttar, at norðmaðurin heldur fram í venjarasessinum næsta ár.

 - Hann heldur fram í eitt ár afturat. Hann hevur gjørt hetta til fulnar, og vit eru stak væl nøgd við hann. Vit gjørdu ein tvey ára sáttmála við hann, so tað liggur fast, sigur Tummas Lervig.