Javnstøðunevndin: Ræðisrætturin skal vera hjá kvinnuni

Javnstøðunevndin mælir til, at kvinnan, innanfyri eitt rímiligt og virðiligt mark, hevur ræðisrættin til at velja, um hon vil hava fosturtøku.

Tað sigur Javnstøðunevndin í viðmerking, nú arbeiðið at endurskoða fosturtøkulógina frá 1956 er byrjað.

Nevndin sigur, at ræðisrætturin skal liggja hjá kvinnuni.

Føroyska fosturtøkulógin frá 1956 er ótíðarhóskandi og skapar ótryggar og óvirðiligar karmar fyri kvinnur, ið vilja hava fosturtøku í Føroyum.

Sum samfelag hava vit skyldu til at tryggja kvinnum møguleika fyri at velja fosturtøku á einum tryggum og upplýstum grundarlagi.

Føroyska fosturtøkulógin er millum tær strangastu í Evropa, og er hon smíðað í eini tíð, tá ræðisrætturin hjá kvinnuni í samfelagnum var munandi øðrvísi, enn hann er í dag.

Tí mælir Javnstøðuevndin til, nú fosturtøkulógin verður endurskoðað, at kvinnan, innanfyri eitt rímiligt og virðiligt mark, hevur ræðisrættin til at velja.

Samrøða verður við Bjørk Kunoy, forkvinnu í Javnstøðunevndini, í útvarpstíðindunum klokkan 12.20.