Facebook og Instagram umhugsa gjald frá brúkarum í ES-londum

Fyritøkan Meta, sum eigur Facebook og Instagram, umhugsar at krevja umleið 13 evrur um mánaðin fyri útgávuna av Facebook og Instragam á fartelefonum í ES, sum ikki hava handilslýsingar.

Tað skrivar Wall Street Journal, sum vísir til eitt uppskot, sum Meta hevur sent eftirlitsmyndugleikum í ES. 

Sambært blaðnum, kann hetta koma í gildi um fáa mánaðir.

Gjaldið er galdandi fyri tey, sum ikki loyva Meta at skráseta talgilda virksemið hjá sær, so at Meta kann vísa teimum útvaldar handilslýsingar.

Uppskotið er aftursvar til nýggju ES-reglurnar, sum áseta, at brúkarin skal geva samtykki til at savna inn dátur.

ES-dómstólurin sett forboð

Sambært ætlanini, fer tað at kosta umleið 13 evrur um mánaðin fyri at sleppa undan lýsingum á Instagram ella Facebook-kontuni á fartelefon, og umleið 10 evrur á teldu.

Í juli setti ES-dómstólurin Meta forboð fyri at savna inn dátur um brúkararnar við dátum frá uttanhýsis netsíðum.

Fyrr í ár gav dátueftirlitið í Írlandi Meta 390 milliónir evrur í bót fyri brot á persónsverndarlógina hjá ES.

Meta hevði, sambært dátueftirlitinum, á ólógligan hátt tvingað brúkarar at góðtaka lýsingar, sum vóru lagaðar til persónin.

Meta fer framvegis at bjóða ókeypis atgongd til Facebook og Instagram, og tá verður tað við lýsingum.