EYA skal gera verkætlan um røktarheim í Hoyvík

Sáttmáli varð í morgun undirskrivaður við fyritøkuna EYA og Tórshavnar kommunu, um at gera verkætlan nýtt røktarheim á Stórubrekku í Hoyvík.

Í røktarheiminum verða 64 búpláss til eldri, 16 røktaríbúðir og dagtilboð til 50 eldri, heimabúgvandi borgarar.

EYA átti vinnandi uppskotið um nýggja røktarheimið, sum var kunngjørt í mars, og nú er klárt er at fara undir arbeiðið at prosjektera bygningin lidnan.

EYA, røktarheim í Hoyvík

Tá skrivað var undir sáttmálan við EYA um at projektera nýggja røktarheimið í Hoyvík. (Mynd: Tórshavnar kommuna)

Røktarheimið verður bygt oman fyri bygningin hjá Føroya Tele, á einum øki, ið er 50.000 fermetrar til víddar. Bygningurin verður umleið 6.700 fermetrar.

Umframt tilboðini til eldru borgararnar, verða stórkøkur, vaskarí, høli til fysioterapi og ergoterapi o.a. í bygninginum.

Sambært tíðarætlanini verður EYA liðugt við projekteringina í september 2024. Síðani verður arbeiðið at byggja røktarheimið boðið út.