Reiðarafelagið sleppur í Hægstarætt við uppboðssølunum

Reiðarafelagið hevur fingið loyvi frá Processbevillingsnævnet at fara í Hægstarætt við málinum um uppboðssølurnar fyri nøkrum árum síðani.

Reiðarafelagið stevndi landsstýrinum í sambandi við lógaráseting um, hvussu veiðirættindi skuldu seljast á uppboði. 

Reiðarafelagið vann í Føroya rætti, men Eystari landsrættur frídømdi hinvegin landsstýrið.

Málið verður nú fyrireikað til at fara í Hægstarætt einaferð næsta ár, sigur Stefan í Skorini, stjóri í Reiðarafelagnum.

18 mió. kr. 

Endurgjaldskravið er slakar 18 mió.kr. Men tað er bara fyri 2016. 

Kravið fyri 2017 verður ikki kunngjørt enn.

Endurgjaldskrøvini eru parkerað fyri fyrst, sigur Stefan í Skorini.

Fyrst skal Hægstirættur staðfesta, um landsstýrið hevur endurgjaldsskyldu.

Reiðarafelagið vil hava Hægstarætt at gera lógina um uppboðssølu ógilduga.