Seta pakkaboksir upp kring landið

Nýggjar pakkaboksir eru settar upp kring landið, og í næstum verða enn fleiri at síggja kring landið, sigur Posta í tíðindaskrivi. 

Tey flestu kenna pakkaboksir frá uttanlandsferðum í eitt nú Íslandi, Danmark og øðrum londum, sum gera tað lætt hjá viðskiftafólkum at heinta og senda pakkar. 

- Tað er týdningarmikið at gera tað einfalt og trygt hjá okkara viðskiftafólkum at senda og heinta pakkar. Pakkaboksirnar verða væl staðsettar kring landið, og nógvar verða atkomuligar alt samdøgrið. Í fyrstu atløgu verða pakkar lagdir í pakkaboks, um kundin ikki er inni, tá ið Posta kemur á gátt. Tað ber eisini til t.d. at fáa reseptheilivág lagdan í eina pakkaboks um Vangan, sigur Jógvan Joensen, virkandi stjóri á Posta. 

Tilsamans verða 20 pakkaboksir settar upp kring landið næstu mánaðirnar. 

Tær fyrstu tríggjar pakkaboksirnar eru staðsettar á Posta á Óðinshædd í Havn, hjá Magn í Klaksvík og uttan fyri Tjaldurs apotek í Havn.

Pakkaboksirnar verða klárar at brúka seinni í oktober.