Matvøruprísirnir hækka framvegis

Prísirnir á matvørum hækka framvegis, men ikki so nógv, sum teir hava gjørt.

Tað vísa nýggjastu tølini frá Hagstovu Føroya. 

Brúkaraprístalið er hækkað 3,7 prosent.

Brúkaraprístalið vísir prísgongdina á vørum og tænastum, sum eru partur av nýtsluni hjá húsarhaldunum í Føroyum. Tað er eitt mát fyri inflatión í Føroyum. 

Matur og drekka átta prosent dýrari

Størsti prísvøkstur er á mati og drekkivørum. Vøksturin var átta prosent frá august í fjør til august í ár.  

Frá mai til august í ár hækkaðu prísirnir á matvørum 0,4 prosent. 

Príshækkingarnar á matvørum hava ligið millum tvey og næstan fýra prosent hvønn ársfjórðing síðani februar í fjør. 

Seinasta árið eru prísirnir á breyði og kornvørum, grønmeti og frukt hækkaðir serliga nógv. Grønmeti er vorðið góð 13 prosent dýrari hjá húsarhaldunum at keypa. Prísvøksturin á breyði og kornvørum er góð 10 prosent, meðan prísurin á frukt er hækkaður sløk 11 prosent. 

Allar matvørur dýrkaðar

Prísurin á fiski er vorðin góð fýra prosent dýrari seinasta árið. Mjólk, ostur og egg eru dýrkað sløk trý prosent, sumer heldur minni enn rísvøksturin á øðrum matvørum.

Allar matvørur eru dýrkaðar seinasta árið.

Prísirnir á sukri og góðgæti eru hækkaðir góð sjey prosent. Eisini eru drykkjuvørur vorðnar dýrari.

Prísurin á kaffi, te og kakao seinasta árið er hækkaður meira enn 18 prosent, sigur Hagstovan.