Bernhard fekk ársins sálarheilsuvirðisløn

Bernhard H. Petersen fekk ársins sálarheilsuvirðisløn í ár frá Sinnisbata.

Grundgevingin er, at Bernhard H. Petersen hevur í mong ár verið virkin í Frelsunarherinum, har hann hevur gjørt eitt serliga gott arbeiði fyri heimleys í Føroyum. 

Hann var við í arbeiðinum, tá Frelsunarherurin fyri 25 árum síðani læt upp Herbergið.

Sirið Stenberg, landsstýriskvinna, segði, tá hon handaði virðislønina, at tá tey fyri stuttum stóðu í dýrastu neyð, tí støðan var blivin so akutt hjá nógvum heimleysum fólkum, komu eini boð í innbakkan hjá sær. 

Set teg í samband við Bernhard

"Set teg í samband við Bernhard, stóð tað. 

Eg veit, at hann hjálpir. 

Vit so gjørdu, og tað tók stutta tíð, so høvdu vit gjørt eina avtalu um fleiri herbergspláss. 

Hetta var dømi um hjartaligheit, sum bleiv førd út í lívið," segði Sirið Stenberg.

Hetta er sjeynda árið á rað, at Sinnisbati letur virðislønina.