Meginparturin av vindorkuni í Suðuroy kemur til høldar

Í 2021 var bara minni enn helvtin av vindorkuni í Suðuroynni brúkt.

Men so fekk SEV nýggja tøkni, stór elbattarí og synkronkompensator, so nýtslan fór úr 45 prosentum upp í 70 prosent.

Hetta upplýsir Ingilín Didriksen Strøm, landsstýriskvinna, í svari til Helga Abrahamsen, løgtingsmann.

Landsstýriskvinnan sigur, at hetta við avlopsorku er nýtt fyribrigdi í Føroyum. 

Í meginøkinum verður bara helvtin av vindorkuni brúkt, sigur hon eisini.

Men eisini í meginøkinum verða battarí og synkronkompensatorar væntandi sett upp longu í ár.

El-battarískipan hjá SEV í Porkeri, SEV í Porkeri

Nýggj tøki, m.a. við elbattaríum, ger, at nýtslan av vindorkuni í Suðuroy er vaksin úr 45 prosentum upp í 70 prosent. 

Broyta elveitingarlógina

Ingilín Didriksen Strøm sigur, at elveitingarlógin verður broytt, so møguligt og áhugavert verður hjá orkukrevjandi viðskiftafólkum og fólki annars at brúka avlopsorku. 

Ein kundi verður væntandi Fjarhitafelagið í Havn.

Sambært semjuskjalinum millum landsstýrið og Kommunufelagið, er ein serfrøðingabólkur settur at gera uppskot um, hvussu vit skipa ein dynamiskan marknað fyri hesa avloporku. 

Eftir ætlan verður tilmælið latið í november.

Løgtingið 2023, Ingilín D. Strøm

Ingilín D. Strøm, landsstýriskvinna. (Mynd: Bjarni Árting Rubeksen)

Myllur í Neshaga standa stillar

Upplýst verður eisini í svarinum, at vindmyllurnar hjá Vindfelagnum í Neshaga hava allar staðið stillar síðani februar. 

Myllurnar hava avbrendar generatorar.

SEV fer seinni í heyst at gera av, hvat gerast skal við myllurnar. 

Verður avgerð tikin um at umvæla tær, fara tær at mala aftur næsta summar, stendur í svarinum.

Helgi Abrahamsen, sambandsflokkurin, samgongukreppan

Helgi Abrahamsen, løgtingsmaður. (Mynd: Bjarni Árting Rubeksen)