Biden kallar Putin bølmenni

Í einari røðu í gjár kallaði amerikanski forsetin russiska starvsbróðurin fyri eitt bølmenni. 

Tað er ikki fallið í góða jørð í Kreml, skrivar tíðindastovan AFP. 

- Tað kann ikki góðtakast. Vit virða ikki slíkan tóna um russiska samveldið og um okkara forseta, sigur Dmitrij Peskov, talsmaður hjá Kreml. 

Tað var í einari røðu í gjár, at Joe Biden segði, at USA stuðlar bæði Ísrael og Ukraina í stríðnum ímóti yvirgangsbólkum sum Hamas og Russlandi. 

- Vit kunnu ikki, og vit vilja ikki lata yvirgangsbólkar sum Hamas og bølmenni sum Putin vinna. Tað má ikki henda, segði amerikanski forsetin m.a. í røðuni, sum hann helt stutt eftir hann var komin aftur til Washington eftir vitjanina í Ísrael.