Uppskot um tænastugjøld í kommununum kemur í vár

Enn hevur landsstýrið einki gjørt við tað, sum stendur í samgonguskjalinum um heimildina hjá kommununum at krevja gjøld fyri tænastur til húsaeigarar, sum ikki búgva í kommununi.

- Men eg fari í næstum undir fyrireikandi arbeiði at útvega kommununum tær neyðugu heimildirnar til hetta, sigur Bjarni Kárason Petersen, landsstýrismaður, í svari til Sólvit E. Nolsø, løgtingsmann, sum spurdi um tænastugjald fyri veitingar til summarhús.

Hava heimildir

Landsstýrismaðurin sigur, at í summum førum hava kommunurnar longu heimild at taka gjald fyri ávísar tænastur, sum kommunurnar veita húsaeigarum, sum ikki búgva í kommununi. 

Eitt er fyri at tøma septikktangar, og eitt er fyri at sleppa av við burturkast á bingjuplássum. 

Lógaruppskot um tænastugjøld kemur væntandi í løgtingið í vár, sigur Bjarni Kárason Petersen.

Í samgonguskjalinum stendur eisini, at ætlanin er at áseta bústaðarskyldu í sambandi við nýggjar kommunalar byggiætlanir.