Skansin kann eisini vera inni í einum býi

Tað var í gjár, at Herleif Hammer, stjóri í Tjóðsavninum, segði, at stórídnaður skal ikki liggja framman fyri týðandi fornminni. (Tjóðsavnið: Stórídnaður eigur ikki at vera framman fyri fornminni)
 

Tað segði hann eftir, at Tórshavnar kommuna fyrradagin samtykti at nýta eina millión krónur til fyrireiking og prosjektering av at útbyggja havnina framman fyri Skansan.

Men hesum er Kári Johansen ikki samdur í. Hann sigur, at Skansin kann koma meira til sín rætt, við at bygt verður rundan um hann.

Herleif Hammer heldur tað er púra burturvið at innibyrja Skansan. Hann segði soleiðis í Breddanum í gjár.

Stjórin á Tjóðsavninum sigur at nú er nóg mikið, og at havnaútbyggingin má ikki oyðileggja meira av náttúruni í Havn. 

Ikki fingið neyðug loyvi

Í 2013, 2014 og 2015 var málið um Skansabryggjuna eisini fyri, tí Tórshavnar kommuna ætlaði at byggja havnina út - eisini frammanfyri Skansan.

Nógv fólk mótmæltu ætlanini.

Ætlaða útbyggingin bleiv ikki til veruleika. Tann parturin at byggja út frammanfyri Skansan varð tikin burturúr ætlanini, meðan hin parturin varð gjørdur. 

Havnar kommuna sigur, at tað varð gjørt, tí tað dróg út hjá kommununum at fáa neyðug loyvi frá Yvirfriðingarnevndini. 

Loyvini eru ikki enn komin upp á pláss.

Kári Johansen vónar tó at fáa neyðug loyvi.