Vindorkan setur met

Vindorkan setur met, og eftirspurningurin eftir streymi veksur støðugt.

Tað vísa tøl hjá SEV fyri tríggjar teir fyrstu ársfjórðingarnar í ár.

Føroysku elverkini gjørdu til 1. oktober 332 GWt av streymi, og tað er fimm prosent meira enn sama tíðarskeið í fjør.

Av hesum vóru 74 GWt vindorka, og tað er met, skrivar SEV. Sama tíðarskeið í fjør kom vindorkan upp á 46 GWt fyri alt landið.

Vindmyllulundir og stabiliserandi tøkni

Størsti vøksturin er í meginøkinum.

Økta vindorkan stendst í stóran mun av nýggju vindmyllulundunum í meginøkinum og av stabiliserandi tøknini í Suðuroynni.

SEV skrivar, at munandi meira er fingið burtur úr varandi orku í Suðuroy higartil í ár enn í meginøkinum. Fyrstu níggju mánaðirnar eru 55 prosent av orkuni í Suðuroy úr varandi orku.

Í 75 samdøgur var alt elvirksemið í Suðuroy 100 prosent grønt.