Geva ikki fleiri undantøk í Sjúkrahúsverkinum

Felagið Føroyskir Sjúkrarøktarfrøðingar gevur ikki fleiri undantøk í Sjúkrahúsverkinum.

Tað sigur felagið á síni heimasíðu.

- Nú má ábyrgdarloysið halda uppat, og vit hava tí boðað  Sjúkrahúsverkinum frá, at frá hósdegnum 2. november kl. 16 verða eingi undantøk givin á seingjardeildum, skurðdeildum og ambulatorium, sigur felagið.

Sjúkrarøktarfrøðingar, Landssjúkrahúsið, verkfall

Undantøkini í Sjúkrahúsverkinum fara úr gildi klokkan 16 í morgin, og tá verða ikki fleiri undantøk givin. (Savnsmynd: Bjarni Árting Rubeksen)

- Okkara vón er, at hetta fær landsstýriskvinnuna at skilja álvaran og velja semju. Tí nógv stendur upp á spæl. Hetta er eitt stríð um haldførið í øllum heilsuverkinum. 

Landsstýriskvinnan hevur eitt uppskot um semju liggjandi á sínum borði, eitt uppskot, har vit sum felag hava flutt okkum so langt, sum vit kunnu. Tað krevur bert hennara undirskrift, so er verkfallið av, sigur Felagið Føroyskir Sjúkrarøktarfrøðingar.