Løgtingið er til reiðar at steðga verkfallinum

Støðan á arbeiðsmarknaðinum er sera spent. Løgtingsforkvinnan hevur kallað løgtingið saman í úrtíð, klokkan 11.30 í morgin.

Hóast eingin almenn skrá er fyri fundin, bara framløga, so er greitt, hvat løgtingsfólk skulu taka støðu til í morgin. Verkfallið hjá Felagnum føroyskir sjúkrarøktarfrøðingar skal steðgast, í øllum føri í tann mun, at tað ikki gongur út yvir lív og heilsu hjá sjúklingum í sjúkrahúsverkinum. Tað kann merkja, at løgtingið við lóg ásetir nakrar arbeiðsuppgávur hjá sjúkrarøktarfrøðingunum, sum skulu vera undantiknar frá verkfalli.

Felagið føroyskir sjúkrarøktarfrøðingar boðaði fyrr í dag frá, at í morgin klokkan 16 vera undantøkini frá verkfallinum tikin aftur. Við útvarpið í kvøld segði Aksel V. Johannesen seg virða samráðingar- og harvið verkfallsrættin, men at hann samstundis ikki kundi liva við at eitt verkfall setir lív og heilsu í vanda hjá fólki. Tí var hann til reiðar at biðja løgtingið leggja uppí, skuldi tað ikki eydnast pørtunum at finna semju áðrenn klokkan 16 í morgin.

Fyrsta stigið er longu tikið, nú løgtingsfólk hava fingið fundarboð.

Tingskipanin loyvir at lógaruppskot í serligum føri verða løgd fram við stuttum skotbrá. Men sambært §38 í tingskipanini skulu ongantíð ganga minni enn tveir tímar frá tí, at formaðurin hevur endaligt orðað uppskot í hendi, til tað kann leggjast fram á tingfundi.

Tað merkir, at landsstýrið skal koma í tingi við lógaruppskoti um heilt ella lutvíst at steðga verkfallið klokkkan 09:30 fyrrapartin, skal tað leggjast fram tá tingfundurin byrjar klokkan 11:30. Alternativið er at tingfundurin tá verður niðurlagdur, og tingfólk tí eru standby til at viðgera uppskotið í skundi, tá tað einaferð verður lagt fram.

§85 í tingskipanini loyvir, at lógaruppskot kunnu viðgerast í skundi, uttan um vanligu tíðarfreistir og nevndarviðgerðir. Skal tað gerast, so skulu í minsta lagi tríggir fimtingar av tingfólkum á fundi greiða atkvøðu fyri tí. Neyðugt verður við einum slíkum meiriluta, skal lógaruppskotið frá landsstýrinum um at steðga ella avmarka verkfallið avgreiðast í løgtinginum í morgin.

Við útvarpið í kvøld segði Aksel V. Johannesen, løgmaður og samgonguleiðari, at samgongan er samd um at leggja uppí verkfallið við lóg, gerst tað neyðugt.