Kunnu fáa upp í 5.000 kr. í orkuískoyti um árið

Fólk, sum eru illa fyri fíggjarliga, fara nú eisini at fáa orkuískoyti úr landskassanum.  

Tað ætlar landsstýrið, tí avgjaldið á brennievni og onnur orkuavgjøld hækka.

Orkuískoytið kann fáast í 2024, 2025 og 2026.

Orkuískoyti verður, sambært lógaruppskotinum um broyting í lógini um familjuískoyti, 5.000 kr. um árið. 

Húski, sum í mesta lagi hevur inntøkugrundarlag, sum er 275.000 kr., kann fáa orkuískoyti.

400-500 húski fáa orkuískoyti

Oljuískoyti og hjálparískoyti kunnu eisini fáast hesi næstu trý árini.

Okkurt um 680 húski hava fingið hjálparískoyti, sum er 12.000 kr., í ár. Sløk 30 prosent av teimum eru fólkapensjónistar.

Av teimum stívliga 70 prosentum, sum ikki eru fólkapensjónistar, fer stórur partur eisini at fáa orkuískoyti, sigur landsstýrið, sum leysliga heldur, at 400 til 500 húski fara at hava rætt til orkuískoyti.

Hetta fer at kosta landskassanum stívar tvær milliónir meira enn sett er av í uppskotinum um fíggjarlógina fyri 2024.