Vilja hava greiði á, hvat lógin sigur

Lógin er ikki heilt greið, og til tess at fáa greiði á, hvat nú er galdandi, sita vit og viðgera lógina saman við løgfrøðingum.

Tað sigur Óluva í Gong, forkvinna í Felagnum føroyskir sjúkrarøktarfrøðingar, um lógina, sum løgtingið samtykti hóskvøldið um at lóggeva undantøk frá verkfallinum.

Óluva í Gong, sjúkrarøktarfrøðingar, 16:9

Óluva í Gong er forkvinna í Felagnum føroyskir sjúkrarøktarfrøðingar. (Mynd: Bjarni Árting Rubeksen)

Sjúkrarøktarfrøðingarnir hava sent Umhvørvismálaráðnum, sum varðar av lógini, ein fyrispurning, m.a. um trímannanevndina, sum skal setast í samband við undantøkini í sjúkrahúsverkinum. 

Í dag eru fimm vikur, síðani verkfallið hjá sjúkrarøktarfrøðingunum byrjaði.

Hoyr innslag í útvarpstíðindunum:

Jan Mortensen, stjóri á Lønareildini í Fíggjarmálaráðnum, segði við útvarpið í gjár, at tey skuldu umrøða støðuna í dag.

Tá vit tosaðu við hann fyri løtu síðani, hevði hann tó ongar viðmerkingar.

 Semingsmaðurin, Terje Sigurðsson, segði við útvarpið í gjár, at fær hann ikki greiðar ábendingar um, at partarnir hava vilja til at flyta seg, fer hann ikki aftur upp í málið, sum partarnir nú eiga.

Fíggjarmálaráðið góðtók semingsuppskotið, sum Semingsstovnurin legði fyri leygardagin í gjár, meðan Felagið føroyskir sjúkrarøktarfrøðingar vrakaði tað.