Styrkja granskingarsamstarv tvørtur um stovnar

Granskingarstovnarnir í Føroyum hava nú tikið stig til at fáa samstarv í lag undir heitinum "Leiðsluforum fyri føroyska gransking."

- Hetta fer at styrkja samstarvið tvørtur um stovnarnar, sigur Martin Tvede Zachariasen, rektari á Fróðskaparsetrinum.

Í vár umrøddu nakrir av føroysku granskingarstovnunum og Granskingarráðið, hvussu granskingarátøk og -øki kunnu eyðmerkjast og raðfestast í felags samstarvi, so føroysk gransking kann mennast og flytast fram á leið til gagns fyri granskingarumhvørvið og samfelagið sum heild.

Martin Zachariasen

Martin Tvede Zachariasen, rektari á Fróðskaparsetrinum

Ein niðurstøða var, at Fróðskaparsetrið skuldi skipa fyri, at umboð fyri almennu granskingarstovnarnir kundu hittast fyri eitt nú at umrøða felags átøk, evni og tilmæli til politisku skipanina.

Harafturat er Ráðið fyri gransking, menning og nýskapan komið við átta nýggjum tilmælum, ið beinleiðis og óbeinleiðis hava ávirkan á granskingarstovnarnar í Føroyum. Eitt av tilmælunum er, at Fróðskaparsetrið verður snúningsdepil fyri gransking, menning og nýskapan.

Hoyr samrøðu við rektaran á Fróðskaparsetrinum í útvarpstíðindunum: