Ikki neyðugt at kanna fyrimunir og vansar við Jerusalem

Tað er ikki neyðugt hjá landsstýrinum at nýta tíð og orku til at kanna fyrimunir og vansar við at hava føroysku sendistovuna í Ísrael í Jerusalem.

Sendistovan er í Tel Aviv eins og flestu aðrar sendistovur í Ísrael. 

Tað sigur meirilutin í uttanlandsnevndini, nevndarlimirnir hjá samgonguflokkunum og hjá Sambandsflokkinum.

Nevndin hevur viðgjørt uppskotið til samtyktar hjá Miðflokkinum um at staðseta sendistovuna í Ísrael í Jerusalem. 

Gamalt stríð um Jerusalem

Orsøkin er, sigur meirilutin, 75 ára gamla stríðið, sum hevur verið um støðu Jerusalems, sum bæði ísraelar og palestinar meta vera teirra høvuðsstaður. 

Haraftat hevur sendistovan í Tel Aviv enn ikki havt neyðugu tíðina at vísa sítt veruliga virði.

Samanumtikið eigur sendistovan í Ísrael at fáa arbeiðsfrið, halda samgongan og Sambandsflokkurin.

Minnilutin, Miðflokkurin og Fólkaflokkurin, heldur, at hetta er bara ein einføld áheitan á landsstýrið um at kanna møguleikan fyri at flyta sendistovuna til høvuðsstaðin Jerusalem.