KÍ møguleika fyri góðum úrsliti

- Eg haldi, at møguleikarnir eru góðir. Sjálvandi er hetta ein dystur, sum ein kann vænta verður heldur truplari, enn tann í Føroyum. Tað er altíð munur á, tá ein spælir á útivølli í Evropa enn á heimavølli, og nú verður eisini spælt á grasi. Harafturat hevur slovenska liðið verið fyri nógvum atfinningum fyri dystin í Føroyum, sum teir taptu 0-3, og tí skulu løna tað aftur, sigur Agnar Prestá.

Slovensku miðlarnir kallaðu tað aftan á dystin í Føroyum fyri eina stóra skomm, at liðið tapti móti einum føroyskum liði, og tað kann hava tendrað slovenska liðið.

- Eg meti tó, at KÍ hevur ein góðan møguleika at fáa eitt gott úrslit í kvøld, sigur Agnar Prestá.

Í mun til hvussu KÍ liðið er mannað í kvøld, sigur ítrottarskrivarin, at hvørki René Shaki Joensen ella Hallur Hansson eru við, men hinvegin er Odmar Færø aftur, so liðið skuldi verið væl mannað, serliga í verjupartinum. Hann heldur tað kortini vera spell, at serliga René, sum hevur spælt so væl og skjeyt eitt mál á heimavølli ikki er við.

- Mótsatt slovenska liðnum, sum spældi ein harðan oddadyst um vikuskiftið, so hava KÍ leikararnir havt møguleika fyri at hvíla seg, og tað átti at verið ein fyrimunur, heldur Agnar Prestá.

Dysturin, sum byrjar klokkan 20, verður spældur á slovenska tjóðarleikvøllinum, Stozice, ið rúmar umleið 16.000 áskoðarum, men tað hevur gingið stritið at selt atgongumerki. Agnar Prestá sigur, at umleið 50 føroyingar eru millum áskoðararnar.