Samgongan ein frammaná

Samgongan fær ein ordans frammaná og hevði so dyggiliga mist meirilutan, um val var í dag. Tað sigur nýggj veljarakanning, sum portal.fo kunnger í morgun.

Tað er spyr.fo, sum hevur gjørt kanningina.

Kanningin varð gjørd hósdagin, also áðrenn avgerðin um at fara at samráðast við Russland um nýggjan fiskiveiðusáttmála var kunngjørd í gjárkvøldið.

Sambært veljarakanningini hevði Fólkaflokkurin verið nógv tann størsti flokkurin.

Hann hevði fingið 10 tinglimir, fýra fleiri enn í dag, og næstan 29,5 prosent av atkvøðunum.

Sambandsflokkurin hevði eisini havt framgongd og fingið 8 tinglimir - ein meira enn í dag, og 24,2 prosent av atkvøðunum.

Fólkaflokkurin og Sambandsflokkurin høvdu tískil kunnað skipað samgongu einsamallir, høvdu teir viljað tað.

Javnaðarflokkurin er stóri taparin í veljarakanningini hjá Portalinum. Hann stendur bert at fáa 6 tinglimir. Í løtuni hevur hann 9. Javnaðarflokkurin fær tí bert undirtøku frá 18,2 prosentum av teimum spurdu - ein afturgongd upp á 8,4 prosentstig í mun til løgtingsvalið fyri knøppum ári síðani.

Tjóðveldi missir eisini undirtøku. Tey seks løgtingsumboðini tódna niður í 5. 14,3 prosent av teimum spurdu høvdu atkvøtt fyri Tjóðveldinum. Ein afturgongd upp á 3,4 prosentstig.

Triði samgonguflokkurin, Framsókn, missir somuleiðis undirtøku. Hann fer niður aftur á tvey tingumboð - í løtuni hevur Framsókn trý. Afturgongdin er 2,3 prosentstig.

Miðflokkurin, sum er í andstøðu, er í somu støðu sum samgonguflokkarnir, tí hann missir eisini undirtøku. Tó ikki nóg mikið til at tingmanningin minkar, tí hann varðveitir síni bæði umboð.

Sjálvstýrið kom ikki upp um tinggáttina í hesi veljarakanningini.

Samanumtikið eru tað bert 37,7 prosent av teimum spurdu, sum høvdu atkvøtt fyri flokkunum, sum í løtuni manna landsstýrið.

Hesir flokkar fingu 51,8 prosent av atkvøðunum til seinasta løgtingsval.

Harafturímóti atkvøða knapt 60 prosent av teimum spurdu fyri sitandi andstøðuflokkum.

Av teimum spurdu eru tað 12,5 prosent, sum ikki hava tikið støðu, 2,4 prosent høvdu ikki farið á val, meðan 2,6 prosent høvdu atkvøtt blankt.

500 fólk vóru spurd í kanningini, og óvissan er upp til 3,3 prosent.