Andstøðan tekur ikki undir við lønarlyftinum

Andstøðuflokkarnir taka ikki undir við lønarlyftinum hjá samgonguni.

Í einum áliti hjá fíggjarnevndini vísa Beinir Johannesen, Magnus Rasmussen og Steffan Klein Poulsen greitt á, at teir taka ikki undir við lønarlyftinum til ávísar fakbólkar.

Men teir taka undir við, at landið, sum endurgjald fyri lønarlyftið, rindar allan skattafrádráttin til pensjónistar. Hann verður í dag býttur millum land og kommunur.

Landsstýrið hevur gjørt avtalu við Kommunufelagið, sum ger, at kommunurnar ikki skulu gjalda tað, sum lønarlyftið kostar. 

Teir taka eisini undir við, at sendifólk uttanlands, sum eru fult skattskyldug í Føroyum, fáa rætt til barnafrádrátt. 

Endamálið er javnseta sendifólk við skattgjaldarar, sum búgva í Føroyum.