Útlendskir lærarar skulu sleppa at spæla á konsertum

Útlendskir musikkskúlalærarar í Føroyum skulu fáa lættari atgongd til at spæla á konsertum og øðrum tónlistartiltøkum.

Landsstýrið hevur biðið Kaare Dybvad Bek, ráðharra, um at gera eitt uppskot um at broyta útlendingalógina fyri Føroyar.

Endamálið er at sleppa undan kravinum um arbeiðsloyvi til hjástørv, tá fólk hava uppihalds- og arbeiðsloyvi til at arbeiða sum musikkskúlalærarar.

Hetta skal gera tað lættari hjá teimum at vera við í tónlistarligum tiltøkum, sigur landsstýrið. Tey skulu ikki søkja um arbeiðsloyvi í hvørjum einstøkum føri.

Og Kaare Dybvad Bek fer at gera, sum landsstýrið vil.

Uppskot um lógaruppskot verður sent til hoyringar seinni í hesum mánaðinum, hevur ráðharrin boðað føroyanevndini hjá fólkatinginum frá.