Fíggjarnevndin viðger eykajáttan til H-bygningin

Landsstýriskvinnan í heilsumálum, Landssjúkrahúsið og Landsverk eru boðsend á fund hjá fíggjarnevndini fyrrapartin.

Tey skulu svara nevndini, hvat er upp, og hvat er niður í sambandi við eykajáttanir til H-bygningin.

Uppskotið um eykajáttan, 43,7 mió. kr., sum var samtykt, tá onnur viðgerð var, fór aftur í fíggjarnevndina, tá triðja viðgerð var hósdagin.

Orsøkin var, at sambært Frihedsbrevet.fo er hetta ikki seinastu ferð, biðið verður um pengar til H-bygningin.

Hetta ørkymlaði tingfólk, sum atkvøddu fyri uppskoti hjá Jørgeni Niclasen um at fáa málið aftur í nevnd.

Fíggjarlógin

Uppskotið um fíggjarlóg fyri 2024 er eisini á skránni hjá fíggjarnevndini í dag.

Tveir landsstýrismenn eru innkallaðir, Dennis Holm og Djóni Nolsøe Joensen.

Vørn, Havstovan, Strandfaraskip landsins og Undirvísingarstýrið hava eisini fingið fundarboð.