Arbeiðsgevarar: Kommunur eiga ikki at seta pening í bústaðarfeløg

Vinnan heldur ikki, at kommunurnar skulu seta pengar í almenn bústaðarfeløg.

Føroya arbeiðsgevarafelag mælir staðiliga frá, at kommunur skulu seta 10 til 20 prosent sum innskotskapital í almenn bústaðarfeløg saman við Bústøðum.

Hetta er eitt av uppskotunum hjá landsstýrinum um broytingar í lógini um Húsalánsgrunnin.

Arbeiðsgevarafelag hevur havt uppskotið um lógarbroytingar til hoyringar.

Minkar áhugan fyri bygging

Tað sigur stutt og greitt, at uppskotið fer sannlíkt at minka um áhugan at byggja bústaðir.

Talan er um innskot, sum ikki skal forrentast, og kappingin á bústaðarmarknaðinum verður tí  skeiklað, sigur Arbeiðsgevarafelagið. 

Vinnan skal nú eisini kappast við kommunur, umframt Bústaðir, um bústaðarbygging.

Arbeiðsgevarafelagið heldur tað vera rættari at lata leigarum býlisstuðul enn at lata stuðul til almenn bústaðarfeløg.