Ravmagns- og vetnisbilar skulu rinda virðisgjald 1. apríl

Samd fíggjarnevnd tekur undir við uppskotinum hjá landsstýriskvinnuni í fíggjarmálum, Ruth Vang, um at framskunda stigvísa virðisgjaldið fyri ravmagnsbilar og vetnisbilar.

Sambært uppskotinum skulu ravmagns- og vetnisbilar frá 1.januar 2024 rinda virðisgjald av tí partinum av CIF-virðinum, sum fer upp um 200.000 kr.

Hevur ein bilur til dømis eitt CIF-virði, sum er 300.000 kr., skal virðisgjald ikki latast fyri tær fyrstu 200.000 kr., men bara fyri 100.000 kr.

Sambært galdandi lóggávu eru ravmagns- og vetnisbilar avgjaldsfríir alt árið 2024. 

Í gildi 1. apríl

Fíggjarnevndin heldur tó, at nú komið er langt út í november er ov stutt til 1.januar.

Hon mælir tí til at broyta dagin til 1.april.

Tað er, at lógin verður ikki galdandi fyri akfør, sum eru skrásett fyri 1.apríl 2024.

Atkvøtt verður um uppskotið á tingfundinum í dag.