Útgjaldið úr Barsilsskipanini hækkar ikki

Samgongan tekur ikki undir við uppskotinum hjá andstøðuni um at hækka hámarksgjaldið hjá Barsilsskipanini úr 25.000 upp í 28.000 kr.

Meirilutin í rættarnevndini sigur, at skal hækkingin fíggjast við hægri inngjaldi, skuldi inngjaldið hækkað 0,04 prosent av A-inntøkuni.

Hann sigur eisini, at sambært uppskotinum er tað mett at kosta 5,7 mió. kr.

Men tá er endurgjald til arbeiðsgevarar ikki við.

Tí kostar uppskotið, sambært Barsilsskipanini, 8,3 mió. kr.

Men hóast umboðini hjá samgonguni í rættarnevndini halda, at hámarksupphæddin eigur at hækka, heldur hann, at tað eigur at vera við í heildarviðgerð um Barsilskipanina, sum landsstýriskvinnan hevur boðað frá verður gjørd.

Ikki neyðugt at broyta lógina

Harafturat heimilar barsilslógin longu nú at hækka hámarkið eftir lønargongdini í samfelagnum. Tí er ikki neyðugt at broyta lógina, sigur samgongan.

Andstøðuflokkarnir undrast á, at samgonguflokkarnir tosa um heildarviðgerð.

Tað samsvarar ikki við, at allir tríggir samgonguflokkarnir í farna valskeiði høvdu hvør sítt uppskot um at gera smáar tillagingar í Barsilsskipanini, siga andstøðufólkini í rættarnevndini. 

Atkvøðast skal um uppskotið á tingfundinum í dag.