Fíggjarnevndin aftur skrivað álit um H-bygningin

Fíggjarnevndin sigur seg enn einaferð hava fingið váttað, at ikki verður neyðugt at lata H-bygninginum fleiri pengar enn tær 43,7 milliónirnar, sum biðið var um til ta ávísu verklagslógina.

Og landsstýriskvinnan, Sjúkrahúsverkið og Landsverk eru nøgd við H-bygningin.

Nevndin hevur tí aftur skrivað álit um pengarnar til H-bygningin.

Hon mælir aftur nú løgtinginum til at samtykkja málið.

Fór aftur í nevnd

Uppskotið hjá Margit Stórá, landsstýriskvinnu, fór aftur í fíggjarnevndina 16.november, tí politikarar blivu knappliga í iva, um hetta veruliga var seinastu ferð, biðið verður um pengar til H-bygningin.

Ein grein í Frihedsbrevet fekk teir at ivast.

Men tað gera teir ikki longur, í hvussu so er ikki teir, sum eru í fíggjarnevndini.

Ikki endaliga góðkend

Fundarfrágreiðingin, sum var orsøkin til ivamálini, var ikki ein endaliga góðkend frágreiðing.

Frágreiðingin er um part av tí at gera H-bygningin lidnan.

Men tann parturin hevur egna verklagslóg, og er um at víðka parkeringskjallaran.

Triðja viðgerð verður í løgtinginum 5.desember.