Broytingar í kringvarpsgjaldinum sendar til hoyringar

Uppskot um broyting í løgtingslóg um kringvarp er sent til hoyringar.

Tað boðar Almanna- og mentamálaráðið frá. 

Skotið verður upp at styrkja Kringvarp Føroya fíggjarliga við at hækka gjaldið úr 150 krónum um mánaðin og upp í 163 krónur um mánaðin.

Hjá fólki í fólkapensjónsaldri verður skotið upp at hækka gjaldskyldugu upphæddina úr 50 krónum og upp í 63 krónur. 

Tróndur Olsen, Breddin, Kringvarp Føroya

Prístalsjavning frá 2025

Skotið verður eisini upp at prístalsjavna kringvarpsgjaldið fyri fólk hvørt ár frá og við 2025 at rokna í mun til árið fyri.

Og í staðin fyri at nevna ávísan ovara aldur, verður ásett, at tað eru fólk í fólkapensjónsaldri, ið koma undir lægra gjaldið. Á tann hátt verður lagt upp fyri møguligum hækkingum í fólkapensjónsaldrinum.

Ætlanin er eisini at lækka gjaldskyldugu upphæddina hjá smærri virkjum og stovnum, skrivar ráðið í tíðindaskrivi.

Hesi átøk fara væntandi at gera, at stovnurin so líðandi kemur í fíggjarliga javnvág og verður tryggjaður móti árliga prísvøkstrinum.

Uppskotið kann lesast her.

Miðlaráðstevnan 2023, Ivan Niclasen, Kringvarp Føroya

Í kjalarvørrinum á uppsøgnum

Herfyri noyddist Kringvarp Føroyar at fremja umfatandi sparingar fyri at fáa fíggjarætlanina at hanga saman næstu árini.  

Starvsfólkahópurin minkaði við útvið 11 ársverkum, og tað fór at raka skránna í bæði sjónvarpi og útvarpi meint, segði Ivan Hentze Niclasen, kringvarpsstjóri. 

“Kringvarpsgjaldið er okkara játtan, og tað stendur í stað. Tí sigur tað seg sjálvt, at vit kunnu ikki standa ímóti vaksandi útreiðslunum, sum koma av lønarhækkingum og prísvøkstrinum, sum er í samfelagnum. Tí má KVF allatíðina niðurlaga virksemið fyri at hava javnvág millum inntøkur og útreiðslur”, segði Ivan Hentze Niclasen.

Nú eru útlit til, at kringvarpsstjórin kann síggja fram til, at raksturin av Kringvarpi Føroya, sum er einasti public service-stovnur í landinum, verður lagdur í eina fíggjarliga tryggari legu.

Skratsj, Eyðfinn Jensen, Kringvarp Føroya