Rindaði helvtina av endurgjaldinum, áðrenn málið kom í rættin

Landsverk skuldi rinda Tvøroyrar kommunu 163.625 krónur í endurgjaldi fyri at hava dálkað í Froðba í 2018, tá 1800 litrar av flúgvarabensini fóru út í lendið.

Hóast Landsverk noktaði seg sekan, rindaði Landsverk longu helvtina av endurgjaldinum, áðrenn málið kom í Føroya rætt.

Men nú hevur Eystari landsrættur frídømt Landsverk.

Føroya rættur staðfesti annars í januar í ár, at Landsverk hevði ábyrgdina, tá lendið við tyrlupallin í Froðba var dálkað eina januarnátt í 2018.

Landsverk var dømt at rinda 20.000 kr. í sekt fyri brot á umhvørvisverndarlógina.

Orsøkin til, at Eystari landsrættur frídømdi Landsverk, er tann, at Landsverk ikki var ákært fyri tað, sum Føroya rættur dømdi Landsverk fyri.