Løgtingsgrannskoðarar: Aðalstjórastørv eru ikki lýst leys

Løgtingsgrannskoðararnir hava 40 viðmerkingar um landsroknskapin fyri 2022.

Teir hava biðið løgtingið góðkenna landsroknskapin við viðmerkingum, átalum og áheitanum um at fáa viðurskifti í rættlag, sum Landsgrannskoðanin, privatir grannskoðarar og løgtingsgrannskoðararnir vísa á.

Løgtingsgrannskoðararnir undrast til dømis á, at nýggju aðalstjórastørvini eru ikki lýst leys.

Aðalstjórar hava verið fyribilssettir síðani januar í ár. 

Ein aðalstjóri hevur verið í tíðaravmarkaðum starvi síðani 2016. 

Løgtingsgrannskoðararnir minna á, at sambært lógini um tænastumenn og sambært starvsfólkapolitikki landsins eiga øll størv at vera lýst leys alment. 

Teir halda, at fyribilssetan eigur bara at vera brúkt í stutta tíð, og als ikki í eitt heilt ár. 

Sambært sáttmálanum hjá búskaparfrøðingum og løgfrøðingum kann fyribilssetan í mesta lagi vera í tríggjar mánaðir, vísa løgtingsgrannskoðararnir á.