Veiðigjøldini geva 40 milliónir meira enn mett

Landsstýrið sigur, at meirvirðisgjaldið fer at geva 15 mió. kr. meira næsta ár enn mett var í september.

Tað sigur nýggjasta inntøkumetingin, sum fíggjarnevndin hevur fingið.

Men tá verður hugsað um, at stuðulin til hitapumpur og jarðhitaskipanir fer niður í helvt í 2024.

Nú er tó ætlanin at broyta lógina um meirvirðisgjald, so stuðulin ikki minkar kortini.

So koma tær 15 milliónirnar ikki í landskassan næsta ár.

Jarðhiti

Stuðulin til hitaskipanir heldur fram næsta ár. (Savnsmynd)

Meira í felagsskatti

Landsstýrið væntar nú at fáa 10 mió. kr. meira í kapitalvinningsskatti og 10 milliónir meira í felagsskatti.

Kapitaleftirlønirnar geva fýra milliónir minni, og tað ger arvaavgjaldið eisini.

Tollur gevur tríggjar milliónir minni og punktgjøld fimm milliónir minni.

Skrásetingargjaldið fer at geva 10 mió. kr. minni enn mett var í september, og vegskatturin og ferðaavgjald tvær milliónir minni.

Dagførda metingin um tinglýsingargjaldið sigur sjey milliónir minni.

Nýggir bilar

Skrásetingargjøldini verða 10 millónir minni,, enn mett var í heyst. (Savnsmynd)

37,5 milliónir meira

Men veiðigjøldini eru mett at geva 39,5 milliónir meira, enn mett var í september.

So samanumtikið gevur nýggja inntøkumetingin 37,5 milliónir meira enn tann, sum var gjørd í september.

Men tá er ikki lagt upp fyri teimum 15 milliónum í meirvirðisgjaldi fyri hitapumpur og jarðhitaskipanir.