Orkuískoyti: Samgongan mælir til at hækka inntøkumarkið

Samgongufólkini í trivnaðarnevndini eru eitt sindur lagaligari enn landsstýrið.

Tað sæst í álitinum um at hækka egingjaldið fyri heilivág.

Og tað sæst nú eisini í álitinum um familjuískoyti, uppskotið um at lata orkuískoyti árini 2024, 2025 og 2026.

300.000 kr. 

Samgongan, sum er í minniluta í trivnaðarnevndini, hevur eitt broytingaruppskot.

Hans Jacob Thomsen, Súsanna Bertholdsen og Liljan Weihe mæla til at hækka inntøkumarkið úr 275.000 krónum upp í 300.000 krónur, so fleiri kunnu fáa orkuískoyti.

Jørgen Niclasen, Árni Skaale, Johan Dahl og Kaj Leo Holm Johannesen mæla tinginum frá at samtykkja uppskotið hjá landsstýrinum.

Spariuppskot

Teir siga, at 680 húski hava fingið hjálparískoyti í ár. 200 teirra, væntar landsstýrið, fáa ikki orkuískoyti. 

Talan er tí um eitt reint spariuppskot, sum rakar tey allar lægst løntu í samfelagnum, tí hjálparískoytið fer úr gildi á nýggjárinum. 

Meirilutin heldur, at øll átøkini hjá landsstýrinum gera Føroyar til eitt verri og ójavnari samfelag.