Inntøkumarkið hækkar upp í 62.000 kr.

Løgtingið hevur samtykt uppskotið hjá landsstýrinum um, at frádráttarfría inntøkan hjá fólkapensjónistum hækkar úr 45.000 krónum upp í 61.900 krónur.

Fólkaflokkurin mælti til at hækka markið upp í 90.000 kr., áðrenn mótroknað verður í pensjónini. 

Tað broytingaruppskotið fall, og Fólkaflokkurin atkvøddi síðani fyri uppskotinum hjá landsstýrinum, sum fekk 25 atkvøður.

Sambandsflokkurin vil, at arbeiðsinntøka ikki longur skal mótroknast yvirhøvur.

Flokkurin atkvøddi ímóti landsstýrisuppskotinum.

Uppskotið skal hava eina viðgerð aftrat.