Lógin um pant kemur í februar

Lógin og kunngerðin um pantskipan fyri íløt koma í februar næsta ár.

Uppskotini eru til hoyringar í løtuni.

Ingilín D. Strøm, landsstýriskvinna, hevur svarað Magnusi Rasmussen, løgtingsmanni, sum spurdi um pant.

Sambært nýggju lógini skal vera gjørligt at sleppa av við øll pantáløgd íløt á sama staði.

Lógin fer seinni eisini at umfata onnur íløt enn fløskur.

Magnus Rasmussen, Magnus Rasmussen og játtanarkarmar 2024

Magnus Rasmussen, løgtingsmaður fyri Sambandsflokkin og fyrrverandi landsstýrismaður í vinnumálum, hevur spurt um pantskipanina. 

Vinnan skuldi sjálv stýra

Uppskotið um pant hjá undanfarna landsstýri bygdi á eina skipan, sum vinnan sjálv skuldi arbeiða saman um og stýra.

Kravið var, at fólk skuldi sleppa av við øll síni íløt á sama staði, tó við undantaki um íløt til rúsdrekka, sum Rúsdrekkasølan skuldi taka. 

Handilsvinnufelagið helt tað vera vert at royna hendan leistin.

Uppskot um lóg og kunngerð vóru send til hoyringar. Freistin var í oktober í fjør.

Samgongufundur, Ingilín D. Strøm

Ingilín D. Strøm, landsstýriskvinna í umhvørvismálum. (Mynd: Bjarni Árting Rubeksen)

Løgtingsval í ótíð

Viðmerkingarnar, sum komu, vístu, at tað fór at vera truplari hjá vinnuni at samstarva um eina pantskipan, enn upprunaliga var hildið.

Táverandi Umhvørvis- og Vinnumálaráð vendi sær til IRF fyri at vita, um møguligt var at fáa eitt samstarv í lag millum IRF og vinnuna um eina pantskipan. 

Og so kom løgtingsvalið.

Arbeiðið at seta eina miðstýrda pantskipan saman vísti seg at vera so orku - og tíðarkrevjandi, at tað hevur tikið tað mesta av 2023, sigur Ingilín D. Strøm.