Havsbrún missir fleiri hundraðtúsund krónur hvørja ferð streymslit er

At streymurin er farin fleiri ferðir í seinastuni, er sera kostnaðarmikið hjá summum fyritøkum.

Ein teirra er Havsbrún í Fuglafirði.

Havsbrún tørvar fimm megawatt av mátti, tá ið framleitt verður. 

Odd Eliasen, Havsbrún, 16:9

"Vit hava tvær verksmiðjur, og vit missa 12 tímar av framleiðslu, hvørja ferð streymurin fer. Tað merkir, at fóðurverksmiðjan ikki framleiðir 300 tons av fóðuri, meðan fiskamjølsverksmiðjan, ið framleiðir 2400 tons um samdøgrið, hevur mist 1200 tons. So tá nógv framleiðsla er, so hevur tað stórar fíggjarligar avleiðingar hjá okkum, tí vit missa fleiri hundraðtúsund krónur hvørja ferð," greiðir Odd Eliasen, stjóri í Havsbrún, frá. 

Stjórin í Havsbrún heitir á SEV um at siga frá, um stovnurin ivast í veitingartrygdini ávís tíðarskeið, eitt nú seinastu vikurnar, har ein nýggj battarískipan er sett í verk.