- Tíðindi, mentan og ítróttur
9 av 10 føroyingum sóu hondbóltsdystin millum FO-NO leygarkvøldið
![](https://kvf.fo/sites/default/files/styles/news_xtra_xtra_large_2/public/euro24m_poland_vs_faroe_islands_uh24778_ah_0.jpg?itok=gNJkB4rO)
Spennandi landsdysturin í EM-endaspælinum hjá monnum í hondbólti millum Føroyar og Norra, sum varð spældur í Berlin leygarkvøldið, savnaði tjóðina framman fyri sjónvarpsskíggjan. Sambært eini hyggjarakanning, sum spyr.fo hevur gjørt fyri Kringvarpið, hugdu 88,6 prosent av føroyingunum at spennandi dystinum móti Norra, sum endaði við javnleiki 26-26.
“Vit hava ikki sæð so stór hyggjaratøl áður”, sigur kringvarpsstjórin, Ivan Hentze Niclasen. “Gaman í hava vit ikki hyggjaratøl fyri eitt nú valsendingar ella ólavsøkusendingar, har vit vita, at hyggjaratølini eisini eru høg, men hetta var nakað heilt serligt”.
Tað vísa tølini fyri dystirnar móti Slovernia og Póllandi eisini. Ávikavist 76,2 og 84 prosent hugdu at dystunum móti Slovenia hóskvøldið og Póllandi mánakvøldið.
Hyggjara- og lurtaratølini eru sum heild høg
Føroysku sendingarnar – bæði í sjónvarpi og útvarpi – fáa sum heild góða undirtøku, og tað hevur týdning, tí stríðið um miðlabrúkaran er so hart, vísir kringvarpsstjórin á.
“Tøknirisarnir senda so nógv útlendskt tilfar inn á føroyskt øki, og tí er tað fløvandi, at vit kunnu savna so nógvar føroyingar framman fyri skíggjan til slíkar hendingar”, sigur kringvarpsstjórin.
Hondbóltsdystirnir hjá Føroyum móti Slovenia, Norra og Póllandi kunnu síggjast á heimasíðuni hjá Kringvarpinum, til EM-kappingin í Týsklandi er av tann 28. januar.
Tú finnur dystirnar her.