Læknar hóttir

Seinastu tíðina hava læknar ofta verið fyri hóttandi atburði frá fólki. 

Dømi eru um beinleiðis hóttanir ella hóttandi atburð móti læknum í skaðastovum, í 
kommunulæknaviðtalum og í sjúkrahúsambulatorium. 

Eisini eru nógv dømi um beinleiðis og óbeinleiðis hóttanir á sosialum miðlum. 

Læknafelagið ger nú vart við økta ágangin móti læknum og, at læknar ofta arbeiða undir ótryggum umstøðum, sum kunnu hava álvarsligar fylgjur.

Trygdin í vanda

Í ringasta føri kann standa um lív, sigur felagið. 

Læknafelagið sigur seg stúra fyri trygdini og trivnaðinum hjá læknum.

Felagið sigur í yvirlýsing, at nógvir læknar umhugsa annað starv, summi arbeiða minni og uppaftur onnur mistrívast.

Læknafelagið sigur, at karmarnir um trygd eru ikki nóg góðir.

Mannagongdir um trygd hjá heilsustarvsfólki eru ógreiðar, rýmingarleiðir eru ikki í lagi og trot á vegleiðingum er fyri starvsfólk, sum hava verið fyri hóttandi atburði ella ágangi.