Tænastumannakanningar kunnu vera almennar

Tænastumannakanningar eru ikki almennar og heldur ikki rættarfundir í sambandi við tær.

Men landsstýrið kann avgera, at málsviðgerðin verður almenn, um tænastufólkið saman við fakfelagi sínum krevur tað.

Annars verður almenn frásøgn um tað, sum kemur fram í avhoyringum og á rættarfundum, revsað við sekt.

Tað sigur tænastumannalógin um tænastamannakanningar. 

Har stendur, at tænastufólk kunnu fyribils vera frásett ella flutt í annað arbeiði, tá illgruni er um, at tey hava mist tað álit, sum starv teirra krevur.

Rætt til hjálparfólk

Tænastufólk hava rætt til at hava hjálparfólk, tá tey vera avhoyrd.

Hesi hjálparfólk kunnu vera frá fakfelagnum, tænastufólk frá avvarðandi stovni ella ein advokatur.

Tænastufólk hava rætt til at koma við skrivligum frágreiðingum, eisini eftir at avhoyringar eru lidnar.

Tá kanningin er liðug, kemur kanningarleiðarin við einari frágreiðing. 

Um landsstýrið biður um tað, skal kanningarleiðarin eisini koma við tilmæli um avgerð í málinum.