Tær grønu aftur í steypafinaluni

Turið Arge Samuelsen var stóri spælarin hjá Kyndli, tá tær grønu vunnu trygt á VÍF í seinnu hálvfinaluni í steypakappingini og tryggjaðu sær grannafinalu ímóti Neistanum.

Vongurin, sum fyri tíðina spælir mest á bakkinum, skeyt 12 mál í 31-26 sigrinum í høllini á Hálsi. Kyndil vann eisini fyrru hálvfinaluna trygt, og tí var ongantíð veruligur spenningur í seinna dystinum.

Kyndil skal sostatt spæla sína triðju steypafinalu á rað. Undanfarnu árini hevur Kyndil vunnið og tapt ímóti H71, men nú verður talan um grannauppgerð. Seinast Kyndil og Neistin spældu steypafinalu var í 2017, tá Kyndil vann 26-21.

Høllin á Hálsi (Faxe Kondi-kappingin)
Kyndil - VÍF, 31-26 (15-12)

Toppskjúttar, Kyndil: Turið Arge Samuelsen 12, Bjarta Osberg Johansen 4, Sólja Bárðardóttir Poulsen 4, Nadja Pejovic 4
Toppskjúttar, VÍF: Fríða Nolsøe Olsen 7, Rannvá Olsen 5