Útlendsk ávirkan skal avmarkast

Hóast lógin sigur, at tað bara eru føroyingar, sum skulu troyta tilfeingið í sjónum, so hava útlendingar atgongd gjøgnum menningar- og royndarkvotur.

Tað vísti seg, tá ið ein kvota upp á 1200 tons av svartkjafti varð latin felagnum SAGA, sum er eitt útlendskt felag.

Vit høvdu ætlað at spurt landsstýrismannin, um hetta er í samsvari við lógina, men hann er staddur í Grønlandi.

Og Fiskimálaráðið vil annars bara svara Degi og viku við tíðindaskrivi.

Í skrivinum stendur millum annað, at ásetingarnar í lógini um sjófeingi um ognarviðurskifti fevna um vinnuligan fiskiskap og ikki um framleiðslu á landi.

Í Løgtinginum ivast bæði samgongu- og andstøðutingfólk í, um tað er rætt at lata útlendingum fría atgongd til royndar- og menningarkvotur.

Bæði Jacob Vestergaard úr Fólkaflokkinum og Henrik Old úr Javnaðarflokkinum ávara um útlendska ávirkan og halda, at hon skal avmarkast.