Sambýlið í Reynstúni fær tvær milliónir aftrat

Løgtingið hevur endaliga samtykt at játta tvær milliónir krónur aftrat til sambýlið á Argjum til fólk við menningartarni og fjølbreki.

Samlaði kostnaðurin at byggja sambýlið í Reynstúni á Argjum hækkar sostatt úr 54 upp í 56 milliónir krónur.

Tær tvær milliónirnar eru tøkar í fíggjarlógini fyri 2024, sigur Almannaráðið, tí sambýlið á Mýrini bleiv bíligari enn mett.

Í viðmerkingunum til lógaruppskotið stendur, at príshækkingar, longd byggitíð og annað hevur gjørt, at neyðugt var við størrii fíggjarkarmi. 

Byggitíðin er longd, m.a. tí veðrið hevur verið vánaligt, og ringa veðrið órógvaði eisini arbeiðið við at leggja fjarhita í jørðina undir bygninginum.