Dagur og vika vera klokkan 18.30

Tíðindasendingin er flutt ein hálvan tíma fram í sambandi við venjingardystin millum Føroyar og Danmark, sum byrjar klokkan 19.15

Sjónvarpstíðindini í kvøld vera klokkan 18.30 - hálvan tíma fyrr enn vanligt.

Solby Christiansdóttir

26.03.2024 - 15:33

Tað er í kvøld, at føroyska A-landsliðið í fótbólti spælir venjingardyst móti Danmark.

Føroyska liðið spældi móti Liktinstein fríggjadagin og vann trygt 4-0, men mótstøðan í kvøld kann ikki samanberast við Liktinstein.

Håkan Ericson, landsliðsvenjari, sigur, at liðið skal ikki ov langt aftur á vøllin at verja, og hann vónar, at spælarar sum Brandur H. Olsen kunnu gera sítt til, at Føroyar kunnu halda upp á bóltin í løtum.

Håkan Ericson

Håkan Ericson, landsliðsvenjari.

- Tað hevði sjálvandi verið stak gott at fingið eitt gott úrslit í móti Danmark, men vit arbeiða við ymiskum. Vit fara til dømis at gera útskiftingar, sama hvat støðan er, sigur landsliðsvenjarin.

Kringvarpið sendir dystin í sjónvarpinum í kvøld.

Av tí at dysturin byrjar 19.15, senda vit Dag og viku kl. 18.30. Eftir Dag og viku kemur veðrið og síðani fótbóltsdysturin millum Danmark og Føroyar.