Løgmálaráðið: Kjarnorkutilbúgvingin er til reiðar

Nú tíðarhóskandi kjarnorkutilbúgving er ment, eru Føroyar til reiðar at ímóti kjarnorkuriknum kavbátum. Tað sigur Løgmálaráðið í tíðindaskrivi. 

Arbeiðs- og brunaeftirlitið hevur seinastu tíðina lagt stóra orku í at útvega útgerð og at menna førleikar til at seta á stovn eina virkna kjarnorkutilbúgving í Føroyum.

Higartil hevur kjarnorkutilbúgvingin ikki verið tíðarhóskandi og neyðugt hevur verið at sent boð eftir fólki og útgerð frá Beredsskabsstyrelsen úr Danmark í sambandi við kavbátavitjanir. 

Við nýggju tilbúgvingini verður hetta ikki neyðugt longur, sigur Løgmálaráðið.

“Tað sigur seg sjálvt, at vit skulu menna slíkar førleikar í Føroyum, og at vit skulu stremba eftir egnum og haldførum loysnum,” tað sigur Bjarni Kárason Petersen, landsstýrismaður í tilbúgvingarmálum.

Landsstýrismaðurin gleðist um, at Arbeiðs- og brunaeftirlitinum hevur borið so skjótt at við at fáa til vega eina kjarnorkutilbúgving við framkomnari útgerð.

Útgerðin, talan er um, er millum annað fýra framkomin gammaspektrometur - sokallaðar “probur” - og telduforrit, sum neyvt kunnu máta øll sløg av geisling á sjógvi og á landi. 

Tilbúgvingin inniber eisini, at fólk hjá Arbeiðs- og brunaeftirlitinum hava fingið venjing í at brúka útgerðina.