Kommunal grundstykki tikin av skrá

Tey, sum høvdu ætlað sær eitt av teimum 18 grundstykkjunum, sum Tórshavnar kommuna hevði í umbúna at selja fyri undirprís á Signabø, mugu brynja seg við toli.

Eitt mál um 18 kommunal grundstykki á Signabøi í Kollafirði varð í gjárkvøldið tikið av skrá á býráðsfundi í Havn

Mynd: Savnsmynd

Jón Brian Hvidtfeldt

25.04.2024 - 11:05

Málið um grundstykkini varð nevniliga tikið av skránni á býráðsfundinum í Havn í gjárkvøldið, tá tað annars skuldi avgreiðast.

Tórshavnar býráð hevur samtykt at selja hesi stykkini fyri fastan prís, 500.000 krónur fyri eitt byggibúgvi grundstykki, sjálvt um kostprísurin er nakað oman fyri 700.000 krónur.

Sambært gerðabókini hjá býráðnum merkir tað, at Tórshavnar kommuna sjálv má leggja út 3,7 milliónir krónur til arbeiðið at gera stykkini bygibúgvin. Pengar, sum ikki fáast innaftur við at selja stykkini, nú tey skulu seljast fyri minni enn kostprís. Sambært gerðabókini eru pengar ikki tøkir í fíggjarætlanini til hesa eyka útreiðslu.

Undir viðgerðini hevur staðbundna nevndin í Kollafirði ynskt, at øll grundstykki í Kollafirði verða útboðin samstundis. Og á býráðsfundinum í gjárkvøldið var málið um tey 18 grundstykkini so tikið av skránni.