Brimheim kemur til Føroya í oktober at spæla konsert í Løkshøll

Løkshøll, ið seinastu tíðina hevur spent seg út við nógvum spennandi konsertum og tiltøkum, tykist ikki ætla at helma í. 

"Vit eru fegin at kunna seta Brimheim á konsertskránna í Løkshøll leygarkvøldið 19. oktober í ár," skrivar Løkshøll í tíðindaskrivi í dag. 

Brimheim er ein av mest eyðsýndu stjørnum á alternativa pop- og rokkpallinum bæði her heima og altjóða.

Síðani hennara fyrstu útgávu "Can't hate myself into a different shape" frá 2022 hevur føroysk-danska Helena Heinesen Rebensdorff veruliga staðfest sín leiklut sum máttmikil og óbrýndur diamantur, ólík nøkrum øðrum.

G! 2023, Brimheim

Mynd: Joe Miller

Skumpar til mørkini

Brimheim er torfør at seta í bás tónlistarliga, halda tey í Løkshøll í Runavík, tí hon skumpar til mørkini,  tá ið hon við síni eyðkendu rødd, orðum og tónum granskar og vitjar døpru, intimu og eirindarleysu sinniskrókarnar.

Tónlistarliga úttrykkið og framleiðslan skifta millum tað sárbæra, nívandi og tað ráa, stórfingna og tekstirnir bjóða eisini av og fara í dýpdina.

Tað hevur heldur ikki skortað við góðum ummælum og heiðurslønum til Brimheim, bæði her heima og altjóða. 

Seinastu tvey árini hevur hon vunnið fleiri Faroese Music Awards-virðislønir fyri m.a. ársins útgávu, bólk, sang, sangara og samleika. Hon hevur eisini verið tilnevnd "Årets Talent" í Danmark í 2022 og "Årets Håb" í 2021 og hevur framført á stórum altjóða festivalum so sum The Great Escape, Eurosonic, Reeperbahn Festival, Roskilde, Iceland Airwaves, KEXP og skal eisini spæla til OL í París í ár.

Brimheim, ratking, Helena Heinesen Rebensdorff

Mynd: Andre Hansen

5 av 6 stjørnum í GAFFA

Hennara nýggja útgáva, RATKING, kom út 22. mars í ár, og konsertin í Løkshøll er byrjanin upp á eina longri konsertferð í Evropa.

Tónleikatíðarritið GAFFA gav útgávuni 5 út av 6 stjørnum, og ummælarin skrivaði: "Oplevelsesrigt, frækt og nuanceret. Jeg er vild med det!"

Helena Heinesen Rebensdorff greiddi eisini frá um Ratking, tá ið hon var gestur í sendingini LEITISSTEIN í útvarpinum 19. mars í ár. 

>>Hoyr eisini: LEITISSTEIN 19.03.2024 (Brimheim)

Brimheim, ratking, Helena Heinesen Rebensdorff

Leygarkvøldið 19. oktober kl. 20 stendur Brimheim saman við sínum bólki á pallinum í Løkshøll.