KAF kúvendi úr Fasta gerðarrættinum

Fasti gerðarrætturin skal kortini taka støðu til, um verkafólk hjá tí almenna hava loyvi til at fara í verkfall á midnátt.

Stutt fyri døgurða, klokkan trý korter til tólv, fekk Gerðarrætturin áheitan frá Kommunala arbeiðsgevarafelagnum um at taka støðu til, hvørt fráboðaða verkfallið hjá arbeiðarafeløgunum er óheimilað stríðsstig.

Kommunala arbeiðsgevarafelagið heldur ikki, at fakfeløgini á privata arbeiðsmarknaðinum hava rætt til at lýsa verkfall fyri teir limir, sum arbeiða hjá kommununum.

Og tá arbeiðarafeløgini halda fast við, at hesi starvsfólk fara í verkfall á midnátt í kvøld, valdi Kommunala arbeiðsgevarafelagið at leggja málið fyri Fasta gerðarrættin sum eitt skundmál. Tað vil siga, at gerðarrætturin skal taka støðu til tað beinanvegin.

Alfred Petersen

Alfred Petersen er formaður í Fasta gerðarættinum.

Tveir tímar

Men tað gingu minni enn tveir tímar, so varð málið tikið aftur úr Gerðarrættinum.

Tað váttar Alfred Petersen, formaður fyri Fasta gerðarrættin. Málið varð afturkallað úr fasta gerðarrættinum stutt eftir døgurða, um hálvgum tvey tíðina seinnapartin.

Lønardeildin hjá Fíggjarmálaráðnum hevur havt somu støðu sum Kommunala arbeiðsgevarafelagið, nevniliga at fakfeløgini hava ikki rætt til at lýsa verkfall fyri sínar limir, sum arbeiða hjá landinum. 

Við Dimma.fo sunnudagin segði Jan Mortensen, stjóri á Lønardeildini, at "fara fólk hjá landi ella kommunum í verkfall, verður hetta lagt fyri Fasta gerðarrættin sum skundmál."

Lønardeildin kom tó ongantíð so langt sum at leggja málið fyri Fasta gerðarættin.